C'est qu'un au revoir!!!

... ça, c'est Paris....

s isch ganz still, s einziga was ma gseht isch a schiinbar endloses Hüüsermeer, zwüscha dinna ragend Bauwerk usa... und langsam, langsam wirds heller....
Hüt morga, bini mit dr Ursula mit dr ersta Metro noch em Usgang zum Sacré Coeur ufa.. (7.00 Uhr Akunftsziit) s letschts mol über Paris luege..s letschts mol... wia ungern i das ussprich...
Mit Coldplay im Ohr, dem Usblick und dena Verabschiediga vo da letschta zwei Täg im Hinterkopf... (und wohrschinlich het d müadigkeit au mitgspielt) hend denn scho ei zwei Abschiedsträne dr Wäg über üsi Backe gfunda..
S isch eifach so kitschig schön gsi, wia d Sunna langsam eis Quartier noch em andere belüüchtet het...

s isch also sowiit, 6 Mönet sind verbii... unglaublich! s bliibt mer eigetnlich nid z viil z sega.. i han do halt eifach zwei drei Menscha sehr sehr gera kriegt... Menscha wo jetz widr wiit weg sind vo miar ob in Frankriich, Düütschland, östriich oder SChweda...und ... klar ka ma sega, ma gseht sich wieder... aber wer weiss scho wenn...
I han Paris uf a Art kennaglernt wia ma sichs nur wünscha kann und s wird mer fehla, dia grössi, dä Trubel, das Leba... dia stetig Veränderig...
Jo, momentan isch mis ganza Befinda wohl eher als sentimental emotional abzstempla, aber s isch halt so... en Abschied isch nie liecht..

s Résumé für das halba Johr loht sich also kurz fassa....: Als Au-pair ischs nid immer liacht... obwohl i s sehr sehr guat troffa han mir Familie (hui, do ghört ma Gschichta seg i eu...)
Aber s isch a Chance gsi, einigermassa billig a Sproch z lerna... a Stadt kennazlerna und i han soo vil erlebt, glernt und erfahre... das isch eifach ..nid in Wort z fassa. und s schöna isch immer, dass eim d Erinneriga niemert neh kann.. und do bini sehr dankbar drfür!
und i han gester es philosophischs gspröch gha, über mini Zuakunft und han denn vo amana gwüssa Thomas (franz: Toma!) erfahra, dass ma in minara Hand düütlich lesa kann, das i widr zrugg koh wirda und no vil erleba wirda in Paris..das sig mini Bestimmig... joooooo mol luaga:)

Bald wird also d maman do ufkrüüza, denn packemer und fahrend hüt no richtig Meer... und entweder am 1. oder 2. Juli het mi denn dr Bündner Boda widr! i freu mi uf eu!

I danka eu also, dass iar mini 170 Täg do in Frankriich so interessiert mitverfolgt hend... glesa hend...

Es letschts mol: Bisous à Tous! Prenez soin de vous et à Bientôt!

euri annatina, tiinchen, ....

Typiquement français?

salut!!!!

************ZENSUR (Für eu Gianno und De-iar Tourista)****************
nur no wenigi Täg... und i dr Kultur jetz ganz abgschwoora han, well s mer einiges wichtiger isch no möglichst viel ziit in da verschiedana Arrondisements verbringa, Baguette z essa und mis "Français de la rue" z verbessera... aber do jo detaillierti Erzähliga über so Weekends nid sooo spannend sind... (jo iar zwei, genau weg da Zensura)... lohn i mi mol über d Franzosa us...( bin jo scho gnueg gfrogt worda, öb d Klisches zuatreffend..)

Nach langer Studie bini also zu gwüsa Erkenntnis koh...d Spezies vo da "Frosch-Fresser", wia ma si teilwiis liebevoll betitlet, betrifft! Aber Achtung! I kann do nur über Pariser reda.. und schiinbar unterscheidend dia sich jo sehr vo da sustiga Landbewohner... schliesslich gilt: "entweder Stadt(Paris) oder Land...beides kanst du nicht lieben..."!

1. Béret, Käse, Baguette, Wein... Es Vorurteil wo sich nur teils bestätigt. Wenn ma es Béret treit outet ma sich in Paris ziemlich klar als Tourist; Baguette sind tatsächlich es täglichs Nahrigsmittel, so gseht ma ständig Lüüt mit dena unter am Arm ah..und dia echta Franzosa kömend au nie mit amana ganza Baguette vor Boulangerie zrugg- denn das feine Gebäck wird meistens scho unterwegs aknabberet..vor allem wenns no warm isch.hm.... ; Kääs und Wii ghört sicher au zur Esskultur.. ghört zu jedem Soirée, Pique-nique ... und was ma bim Thema essa nid vergessa sött: Desserts ghörend zum Essa wia alles andere! und groooss müands si!!! Ach wia wird i d Eclairs vermissa....

2. Arrogante Franzosen? ... Dia waschechta Pariser (i denka do liegend Welta zwüscha da Städter und em Land) könnd im ersta Moment scho mol s biz arrogant überakoh, anderi sind drfür eifach gspielt überfründlich... Aber sobald sie merkend, das ma ihri Sproch "beherrscht" und kein nerviga Foti-Tourist isch, werdends offner und dia gspielt fründlichkeit wandlet sich bald in echti... aber si sind halt scho s stolzes Völkli, üsi Pariser... (aber das isch jo au in graubünda so)

3. Charmant, hübsch...?! Wer het das eigentlich erfunda? ds Charmante kunnt wohrschinlich eifach vo dr Sproch, wo au bi Beleidigunge no nett tönt .. und vo dem her, dass si im ersta Moment au würkli halt die oberflächlich Nettigkeit zeigend.... und zum hübscha... jo das isch sicher assichtssach! aber i denka s git eifach alles do in Paris...eifach alles! und schliesslich ischs jo au iiiimmmer no Gschmackssach... gäll Maria:)

4. Stadt der Mode.. do kann i grad nomol das mim "es git alles" ufgriffa. s git keis Over- oder Underdressed in Paris. Vo schwarz bis Lüücht-stift-Farbe, vo hocha Männerschuah bis rosarotem Trainer im Usgang gits alles... Kei Frisur z abstrakt, keis T-Shirt z usgfalla... wer sich verwürklicha will kann das do!Vo Secondhand bis Haute Couture... in Paris gits alles!

5...und der Liebe... Ganz klar het Paris für verliebti Päärli sehr vil z büüta. D Pärk, d Seine, d Ussichta, dia kliina versteckta Cafés... zuasätzlich ischs so, dass d Pariser Flirt-Taktik sich wohl so zimli vor Schwiizer unterscheidet:) Aber au für d Célibataires unter üs isch dia Stadt supr..und nicht nuuur zum verliebt sii!

6. ständig im Streik?! Jo!! d Olga het mer mol erklärt, dass d Franzosa sit em 68gi nüm so us dera "miar erreichend öppis wenn mer streikend-" Luuna usakömmend. Si hend immer no z gfühl sehr grossi Veränderiga könna z erwürka... au wenn das sit denn nüm sooo passiert isch. Drum ischs normal, das Züg usfallend, Schuala zua sind.. etc. Ma gwöhnt sich dra...:)

7. zentralistisch und einheitlich? und wia! Paris isch z Zentrum vo Frankriich, au wenn das geographisch wohl eher weniger zuatrifft... do gits kein Kantönligeist.. einheitlichi Schuala, einheitlichi Ziita, einheitlichi Ziel. klar unterscheidend sich vor allem halt eifach d Qualitäta vo da Schuala (->Banlieu)... aber d franzosa sind au langsam uf Fortschritt... schliesslich wennds jetzt s biz meh Freiheite in da Regiona walta loh...nimmt mi jo wunder wia das usakunnt!

8. Révolution ou le roi?? a Frog wo sehr interessant isch. d Franzosa könnd sich anschienend nid sooo ganz entscheide was jetz lässiger isch. Dä Teil vo ihrer Gschicht wo d Königa z Land regiert und alli in Angst und Schrecka versetzt oder d Revolution wo alli vo dem befreit?! Wem verdankends meh? Amana Louis 14 wo prunkvolli Gebäude errichtet het oder amana Robespierre wo für d Freiheit und Gliichheit kämpft het? D Olga het das folgendermassa beantwortet: D Franzosa könnd sich nid entscheide! Beides isch n Teil vo ihrer gschicht und beides fasziniert si... und au wenn si froh sind hets dia Revolution geh... s königlichs Volk sinds halt gliich no gera! Au wenn ma das natürlich weniger gera zuagit:)

und zum Schluss no: Wieso jeder einmal Paris besucht haben muss!! (Achtung...jetzt kumm i ins schwärma...) Paris isch a jungi Stadt und isch trotzdem nid zuuu modern (usser natürlich d Défense...).s git für alli öppis für d Kulturgnüsser (jo, würd eu au mol nid schlecht tua De und Gianno), d Gourmants, d Spaziergänger, d Foti-Tourista, dia Verliabta, d Partygänger (z Nachtleba in Paris isch eifach dr Hammer!!!!!), dia Riicha und Schöna, d Mode-Tussis und d Musikkenner, d Philosopha und d Café-Hocker, dia Gschichtsinteressierte, d Tecktronik-Freaks... und denn,
(für alli blocher -fans).. do lebt alt, jung, hetero und homo, wiis, schwarz, gelb und rot zäma und... klar gits Problem... wia überall wo Gegesätz ufanand prallend.. aber ma versuacht si so guat wia s goht z bewältiga und Vorurteil z begrabe.. scho schön z gseh, dass es eba doch funktioniere kann! (sooo, jetz han i au no das vo miar geh)

Also.... i gang hüt mol widr noch St.Germain-en-Laye... bis bald... versuacha mi nomol zmelda, bevor i do dr heiweg atretta (aaaaah... i hassa das Thema)... wenn i no dr Ziit han...zwüscha gnüssa, gnüssa, gnüssa... (und schaffa..)
Bisous an eu alli!!!!! Freu mi uf eu! annatina

Ps: jo i weiss s het kei neui fotis geh..aber mini verbindig isch so schlecht und ds ufalada isch a einzigi Tortur so... i versuachs aber no in da nögsta täg!!! désolé...

pps: Sämi, geiiiiiiil Gampel!!!!! wär supr!!!!

pas grande chose....

Coucou! en ganz kurza Bricht hüt... aber Neuigkeite sind Neuigkeite nid...

Jo, das isch wohl nüt gsi mit em erste Suisse Spiel.. aber au d Franzosa hend ds Spiel hüt versaut... Aber gnueg über dä Memma-Sport... gömer über zum wichtiga!



Do i jo am Mittwuchmorge usschlofa kann, hend mi d Maria und d Marie überredet s biz am Pariser Nachtleba z fröne... so simmer also am Zischtig Obig ins Duplex ( halt so n In-Club mit bös ussehenda Türsteher und höcha Getränkepriisa).. Doch nach dem Spass... Am Mittwuch han i denn tatsächlich dr Hogga hinter dem ganza gseh: i bin krank worda... (obwohl i s scho vorher ufglesa han müassa.... wells a rechti Grippa gsi isch). I bitte drum kurz um s biz Mitleid eurersiits!...
....
Danke!
...
Dank Tee, sehr viel Schlof und s biz Schonig bini denn aber am Samstig widr ganz fit gsi und han könna z Wuchanend gnüssa! Doch s wia isch üs eifach so gar nid noch Kultur gsi, so hemmers denn am Samstig vor allem bi Pärkli, Café und Diskussiona beloh... am Obig simmer denn ( 6 Mädels..) in es lauschigs Pub namens "Who's Bar", wo a no lauschigeri Band gspielt het..und d Lüüüt sind allgemein ganz lauschig gsi... so hets es denn wella, dass mer widr mol wenig gschlofa hend..aber drfür ischs französischa Plaudere widr mol nid z kurz koh.
Dr Sunntig het denn widr kei Kultur vertreit. Aber immerhin hemmer dr Turm vom Sacré coeur bezwunga und hend döt oba eini vo da schönsta Ussichta über üsi Herzensstadt gnossa. Spöter hemmer üs denn uf dr Treppa vor dr Kircha niderloh. (Am Wuchanend wird nämli d Ussicht vo döt us no musikalisch unterstricha..)
Dr Obig het den ganz am Fuassball ghört...

Und so schnell gohts, isch widr Mäntig...
Mais bon... à une autre... GrandBisou
eures Tiinchen

PS: neui Fötali werdend hüt no ufaglada.... in allna Orndner...

Allez les bleus.....

*************************************************************************************
Salut à tous!

Mit grossa, vil z grossa Schritt, kunnt dr 29. Juni nöcher... Aber das isch grad nomol n Grund alles z geh..oder besser gseit, eifach z gnüssa und nid dra z denka!

-> Dr Victor erklärt ara Kollegin wo sis Huus isch... d'accord??? :)




Bevor i widr mol zu ara vil z lang gfassta, eigetnli unnötig usgschmückta Erzählig über klineri oder grösser Ereignis schritta, möcht i no kurz bekanntgeh, dass mis Velo (nei, s isch nid gstohla worda. obwohl mer dr Mathieu - Franzosa hend en Hang zur übertribig- gseit het, dass i doch wahnsinnig seg miar s Velo z kaufa, das geng doch kei zwei Täg bis das weg sig... aber entgege all dena Warniga: mis Velo isch immer no do und fahrt no, au wenns zimli quitscht..) ...wo bini gsi, bevor i d klammara g öffnet han? Ah jo genau: Mis Velo het en Nama und zwor isch es zuakünftig nur no unter "Paulette" az sprecha... s wird mi den au widr zrugg in d Schwiiz begleite und mer in Genf denn hoffentlich no s Ziitli diene..

Sit em letschta Itrag, han i vor allem gschafft han und in d schuel ganga. ah jo: dr Victor het mi jetzt uu gera... was zur Folg het, dass i jetzt a "Bella" bin und nüm "mechante" wia am afang... :)
z Weekend het denn aber s paar "erste Male" mit sich bracht... z.B. bin i am Fritig z erst mol an dr Champs-Elysée in Usgang. Aber do mer nid grad fasziniert gsi sind- oder üs besser gseit eifach d Musig (uzuz..) und d Lüüt (chic und dämlich) nid passt het- simmer denn in es anders Quartier, wo d Lüüt scho eher üs entsprocha hend..
Was eifach unglaublich gsi isch: um Fraua in ihri clubs z bringa, machend dia alles! nämlich:
- gratis itrit für Fraua
- 2 Stund gratis drinks
- Nagelstudio im hintara Teil vom Club
- speziells Tanzprogramm (...)
- erst noch dem werdend au Männer inagloh...
So wia iar mi jo kennend, isch das nid sooooo min Stil..

Am Samstig bini z erst mol würklich enttüscht gsi vo amana Usflug. Miar sind go d Egouts aluege- d Kanalisation vo Paris, wo d Besichtigung mega aprisa wird. I giba zua, dass d Grössi, d Konstruktion und d Gschicht vom Bau vilicht interessant isch.. aber das ganza goht ma denn in da dunkla Gäng vor Kanalisation go nolesa..., wo s eifach nur stinkt und gruusig isch... do vergoht eim d Lust uf a interessanti Lektüra würkli!
Drum hemmer üs bald ins nögsta Café grettet und s biz Karta gspielt.

Do s widr mol dr ersti Sunntig vom Monet gsi isch sind gwüssi Museum in Paris gratis. Das heisst, i han mer no ds "Musée d'Orsay" agluegt. Und i bin würkli seeeehr z frida gsi. Neb em Gebäude selber, hets eifach extrem vil verschiedeni Sacha z gseh, Werk vo sehr berüahmta Künstler (Nei, dr Berüahmtheitsgrad seit miner Meinig no nüt übers Könna us..)... sehr vil Ziit han i vor allem in dr Foti-Usstellig (sehr alti Fötali), dr Aquarell-Ustellig ( bin totala Fan vom Jongking, Boudin und Manet worda...) und bi da Skulptura verbrocht han.
Noch so vil Kunst han i denn s Päuseli im schöna "Parc Dauphine" gmacht und s biz glesa. Spöter hets denn no s Käfeli mit Donata und Mathieu geh. Miar sind denn no kurz ufs "Viaduc des Arts" - as ehemoligs (Hoch-)Gleis wo jetzt umfunktioniert worda isch zu amana Spazierweg. Es isch unglaublich, dass grad neb dr Bastille ma so in d Natur abtaucha kann- überall hets Bäum, Bluama und Bänkli und vom Verkehr und dr Stadthektik wo wenigi Meter witer una ablauft merkt ma kum s was..
Am Obig han i denn z erst mol in minem Leba "Sushi" gessa.. mir Ursula, wo so Fan isch drvo. I hans zwor gera gha, isch aber nid grad zu minara Leibspeise worda. Was isch do dra sooo bsunders? isch jo nur roha fisch und Riis... s biz schön verpackt!
Und noch amana kurza Abstecher zum Sacré Coeur(hach, dia Ussicht..) bini denn au langsam heiwärts....
Gester han i denn no dia vila Stufa vom Notre Dame-Turm (aber miar hend jo scho üabig: Eiffelturm, Sacré coeur, etc) hinter mi brocht.

Und do drmit isch scho widr s Wuchanend verbi.. aber z nögsta isch nöch!

Zum Schluss no zur meistgstelltischta Frog: Freusch di nid uf s Heicho?!
Doch, klar freu i mi uf eu alli... und au d Au-Pair arbeit isch nach 6 Mönet denn mol gnueg.. Aber Paris und dia Ziit wird mer sicher sehr fehla..und drum fallts mer momentan scho no s biz schwer jeda Tag z merka, dass ma eba nüm sega kann " das möcht i denn au mol no macha..." ..
Aber min Trost isch jo: Paris isch gar nid soo wiit weg vo Genf!

Also, i schick eu vil Bisous.... in d Schwiiz odr wo au immer iar sind! sind sicher scho alli im EM-fieber?? ALLEZ LES BLEUS!!!
Annatina
************************************************************************************

quoi de neuf?? j'adore Paris!

coucou mes potes...

Info:Neui fotos sind in bearbeitig... well s zum ufalada aber amigs ewigs goht..nonit grad hüt z bewundere. Aber bald....bis denn aber s klises musikalisches video zum aluege....

Bruno/brünooo, im Truskel.. klises Konzertli, gmüatlichi stimmig... - Paris, wia i s Liaba...



Während Rägetröpfli sanft uf mis Dachfenster tröpflend... d Vögel dussa zwitscherend und d Kind am "Bob l'eponge" (Spongebob) luegend.. gleitend mini Finger über d Tastatur vo mim Laptop und bringend eu Nochrichta us em benochbarte Land... alors, quoi de neuf?

nebst dem das i natürlich unter dr Wucha gewohnt dr Arbeit nochgohn, was sich natürlich eifach als schöner erwiest, wenn d Kind sich stundelang im Park oder Garta vergnüagend.. und in d Schual gohn... bin i mini Freiziit no voll am usnutza.
Das heisst momentan vor allem, dass ma unter dr Wucha entweder in Chambourcy am Obig es Schwiizerründeli macht.. (miar sind drei Au-pairs us CH) oder in St.Germain-en-Laye a Rundi "Phase 10" (super Spiel, obwohl i immer verlüüra) mit amana Bierli gnüsst!
Ds Wuchanend ghört denn ganz dr Kultur, am "faire la fête" und am umalungara... und z schöna..alli drei Aktivitäta lönd sich in Paris und Umgebig eifach so schön us usfüahra.

letschts Wuchanend isch vor allem widr mol im Zeiche vo da Musee gstanda. Nochdem mer dr Samstig Nomitag mit Kaffee und shoppa verbrocht hend, simmer (Sandra, Isa und i) an d Museumsnacht (- ganz vil Musee vo Paris gratis und offa bis Mitternacht). Bsuacht hemmer denns "Musée de la vie romantique" (zwor recht schöns Plätzli und schön gmacht.. d Bilder sind aber eher halt... jo halt Bilder us dr Romantik nid..:)) und ins "Musée Bourdelle" was üs denn scho eher Idruck gmacht het: grossi Skulptura... fingerfertigkeit..halt eifach d Arbeit vo dem Künstler.
Am Sunntig simmer denn no ins "cité des Sciences.." - es Museum wo vili interessanti Usstelliga het, wo vor allem halt eifach viel alanga, usprobiere und lerna kasch. Nocher isch es fascht scho traditionells Panini-Essa bi üsem "Panini-man préféré" und n Kino-Film (Jackpot) uf em Programm gstanda...

Das Weekend isch denn eher s biz weniger Museum-lastig gsi, aber trotzdem hemmer vil gseh. Am Fritig über da Mittag bini nämlich in "les catacombes" gsi..das sind unterirdischi Steibrüch in Paris. Döt hends im 18. Jhd denn aber dr Platz gnutzt: well d Fridhöf total überfüllt gsi sind hends denn nämlich eifach d Gebei vo Milliona vo Pariser Bürgerinna und Bürger in die Höhlene überfüahrt. Um das ganza dekorativ z gstalta hend denn dia Totagräber das schön hergrichtet, was heisst, dass in dena für Bsuacher hüt zuagänglicha Rüüm jewils uf dr Sita die Gebei schön ufgschichtet sind, d Schädel natürlich au alli in Reih und Gliid oder - ganz kreativ- in verschiedene Forma, wia zum bispiel eimol in Herz-Form. Das ganza isch ziemlich gruselig und am Igang stoht au: "Arrete! C'est ici l'empire de la mort" (Halt an! Hier befindet sich das Reich des Todes)... Fazit: idrücklich, aber gruselig...

Am Obig sind denn d Donata (CH, Chambourcy..) und i ins "La flèche d'or", en ziemlich geile club im Osta vo Paris. s het vil Konzert döt, gueti musig, d Lüüt sind sehr sympathisch und offa, d Stimmig gelasse und gmüatlich und dr Itritt gratis..also was will ma meh. so hemmer denn au erst dr letschti Nachtbus heignoh und sind denn schliesslich noch eire Stund schlofa im Bus am 7i dahai gsi... aber s het sich glohnt!
Am Samstig hemmer denn nebst Café bsuach, Bekantschafta schlüsa mit Bändeli-Knüpfer (wer scho mol z Paris gsi isch weiss welli i meine..), au no dia bekannti Moschee agluegt. au widr mol s was sehr idrücklichs und wunderschöns..
Hüt isch Versaille uf em Programm gstanda. mit dr Natascha bini denn also am Morga scho zur Königsresidenz düüst und döt hemmer noch "nur" 2 stund astoh (kassa, Igang, Wc), endlich könna loslegga mit dr Besichtigung. Obwohls eifach sooo vil Lüüt gha het, ischs unglaublich gsi.überall Gold, Prunk und verschwenderischi Dekorationa.. vor allem naütlrich dr Spiegelsaal, ds Königszimmer etc, hend Iblick geh in a Welt voller Überfluss..während damols z französischa Volk am verhungere gsi isch... Do miar nid sooo vil hend wella zahla und nid hend wella stressa, hemmer denn dr Park mit all sina kliina Nebapalästli nid agluegt.. aber s Schloss selber isch scho gnueg imposant und idrücklich gsi... Fazit: Vil Tourista, tüür... aber es Muss für längeri Ufenthält in Paris!

voilà, c'est tout! i wünsch eu no a schöni wucha... bis zum nächsten Mal!!!
bisous!
votre Annatina

Surprise!!!

Salut!

Ach wia schön sind verdutzti Gsichter... Vilicht isch es bis hüt au zum letschta vo eu duradrunga, dass i dia letschta paar Tägli in dr Schwiiz verbrocht han.
Was sit ende Februar es guet plants und ghüetets Gheimnis (vo miar und mina Eltara) gsi isch, isch doch aber nocher widr ganz ganz schnell verbii ganga. Aber i hans gnossa!
Agfanga het alles letschta Fritig, wo i am 6.40 Uhr scho z Chambourcy an dr Bushaltestell gstanda bin, 2 Stund spöter im TGV richtig Basel düüst und schliesslich am 14.33 Uhr in Sargans mini Maman in d Arma gschlossa han ...
Am Fritig han i also erst mol mini Eltara widr s biz gnossa, dr Bäri natürlich und schlussendlich han i au no mis brüaderli überrascht wo fast d Stäga widr ruckwärts abapurzlet wär!

Am Samstig ischs denn mit da grossa Surprise -Aktiona losganga. Nochdem i am Mittag kurz d Annalea gseh han und d Sarah im Manor in en Schrei-Krampf versetzt han bini guet versteckt noch Haldestei gfahra (pfingstlager Pfadi Graubünda), wo i mi denn imana Lieferwägeli verkrocha han, bis i denn schliesslich mis Stichwort ghört han "Maitlapfadi chur". I bin denn also kurzerhand zum Ruaf vo da Mädels drzuagstossa und han döt für ordentlichi Verwirrig gsorgt! Noch dem i z Lagerleba kurzi ziit gnossa han, bini widr hei. Am Obig han i denn no Yves(tel) und Mimi (stadt) verwirrt... wobi i vor allem z Gsicht vom Mimi niemeh vergessa wirda...

Am Sunntig bini denn widr uf Haldastei wo i denn no bis am Mäntig all dia liaba Lüüt gnossa han und z Lagerleba an sich! Am Mäntig und Zistig han i denn no profitiert einigi Lüüt z gseh und gester bini also scho am Morga (Mittag kurza Zwüschahalt in Zürich für es Käfeli mim Simon) richtig Paris drvo düüst....
Hüt het denn dr Alltag au scho wieder Izug ghalta!
I hans sehr gnossa mol wieder alli z gseh, z knuddla ... aber s isch au schön no s ziitli do z ha! Und zwor ganzi 6 Wucha wo i no in volla Züg gnüssa wirda!

Z Wetter isch herrlich und schön warm und so verbring i jetzt au täglich s Stündli, zwei im Park mit da Kind... was sehr a agnehmi sach isch ( Ruah, s schwätzli mit andere Au-Pair oder s guets Buach..)
I hoffa iar alli gnüssend dr früahi Summer au so wia i!

Bisous an alli
euri Annatina

Kulturtage 2.Teil

A tous... qui sont curieux... Bonsoir!!!

Iar alli hend natürlich gester gspannt min Bricht glesa, könd sither weder schlofa, no essa... well iar so druf wartend...well iars nüm ushaltend endlich d Fortsetzig z lesa.. drum erlös i eu jetz vo eurem liida und präsentiere eu voller Stolz: dr ebeso erfolgrichi und faszinierendi zweiti Teil vo mina PKW-Täg!!!

D Sicht vom Panthéon us.... über mini gliabt Stadt!


Samstig: Noch dem mi am morga (i stohn verpennt in dr Gegend..) n überfründlicha Gärtner durchs Kuchifenster grüasst het (für alli Fraua: nei, keine wia bi Desperat Houswifes...) und i mi summerlich kleidet han ischs au scho bald noch Paris ganga. Ziel: Panthéon. Dank em schöna Wetter hets kum Lüüt gha und i han mi also nid gnervt müassa in a Schlanga stella (tant mieux) und bald bini also widr eimol meh stuunend in grossa Hallana gstanda. Z Pendel in dr Mitti söll d Erdrotation zeige (aber well i natürlich nid han wella stundalang drnebasitza .. zum dr Bewiis gseh..glaub i das jetzt mim Reisefüahrerbüachli eifach), witer han i in dr Krypta d Gräber vo einige wichtiga Franzosa könna beguatachta (jo, i weiss...no meh Toti..). Zum Schluss han i mi denn anara Gruppa agschossa wo uf d Kuppla sind. Vo döt us het ma a super 360 Grad Ussicht über Paris. wunderbar, vor allem bi dem summerlicha Wetter! (Video)
Nocher han i no n kliina Spaziergang durch s paar Gässli gmacht und han mi denn in d Marais (super schöns Quartier) begeh zum no s Käfeli go neh! odr besser n Milchshake, oder ischs s Frappé gsi, was meinender, Joëlle und Rafael?
Fazit: Ds Panthéon isch eis schöns Bauwerk meh in Paris, aber nid unbedingt s muss für a pariser Kurztripp!

Sunntig: Obwohl hüt dr letscht ruhig Tag gsi wär zum nomol richtig usschlofa han i mi scho am halb 9i uf da Weg richtig Paris gmacht. Il faut profiter, hein!? Also bini scho kurz vor da 10i vor em grossa Igang vom "Hôtel des Invalides" gstanda- no so s gigantischs Bauwerk ( Wir danken einmal mehr dem Sonnenkönig). Im "Dôme des Invalides" (grosses goldigs Dach- kennt vilicht dr eint odr ander vo eu vo Bilder..) han i nid nur d Krypta vom grossa Napoléon bestuunt ( dä Typ isch doch echt in öppa 5 verschiedeni Särg ipackt..?!?), sondern do i miar dasmol sogar so s touristischs Hörgrätli gnoh han am Igang han i au d Bedütiga vo Bilder und abbildete Persönlichkeite erfahra.. Aber unglaublich isch eifach wieder eimol meh dr Prunk gsi- Gold und Verzieriga... wunderbar Kitschig!
I han mi denn voll motiviert in d Ustellig vo da zwei Weltkrieg begeh und döt meh als einahalb Stund Gschicht uf mi iprassla loh (etlichi Rüüm - Jahre 1870- 1945)! En Versuach miar nocher no dia detaillierti Ustellig über da "De Gaulle" zu Gemüte z füahra isch den aber noch 30 Minuta gscheiteret und i han mi mit Baguette, Frücht und Salat an d Ufer der Seine begeh und döt eifach no dr Summer gnossa, bis i am 4i d Isabelle am Bahnhof bin go abhola...
Fazit: "Hôtel des Invalides" het für alli gschichtlich interessierte so einiges z büta (s gäbt au no meh z gseh, z.B. a risigi Usstellig über Armeewaffe..).

Iar gsehnd also- noch mina Kulturtäg han i würkli so einiges meh an Wüssa und kulturella Erfahriga! (übrigens han i scho letscht Sunntig en kulturella Usflug gmacht gha: ds Schloss Chantilly)
Und jetzt no zu s was anderem: noch dem a schwedischi Studentin vor einara Wucha imana Taxi ermordet worda isch, han i erfahra, dass a Frau bim Versuach ihri Täscha vor amana Dieb z verteidiga erstocha worda isch vo dem... und jetzt rotend mol wo?! in dem Park, wo i 100 Meter entfernt mini "Heldetat" vollbracht han mini Täscha z retta. nomol Glück gha würd i sega! I han mer noch dem i das ghört han vorgnoh z nögst mol nüm d Heldin z spiele, Promis!

Ah jo no s was: Noch mim Titel "Ich will nicht mehr nach Hause" hend sich einigi vo eu verzwiiflet an mi gwandt i söll doch nid so s was sega! I glauba zwor, das iar ohni mi mindestens genauso guet zwäg sind..aber trotzdem: i kuma wia plant afangs Juli zrugg!
I sött mi jetzt au zu Bett begeh, denn mora erwartet mi wieder d Olga mit viila lässiga Grammatik Ufgaba! (ah jo, i han nögst Fritig a witera Test..druckend miar doch d Düüma!!!)

bisous, euri Annatina

Kulturtage 1. Teil

Koukou!

ça roule? Also, bi miar rollts ziemlich... Bevor i zu amana Erlebnisbricht übergohn, möcht i eu z erst mol z neuschte vom Neue brichta!

Sit s biz meh als einere Wucha isch mini Gastfamilie um zwei Mitglieder grösser worda, nämlich um en Haas (Sassa, oder wia i na nenna: Charly, ghört am Victor) und en Fisch (komischa brasilianischa Nama wo i miar nid merka kann, ghört am André). Mit em letschtara kann i zwor nid so vil afanga, aber dr Charly isch n härziga und miar verstönd üs au scho guet:)

Also, sit am Mittwuch sind d Lacerdas, ohni dia zwei Neumitglieder, in da Feria. do dia meiste vo da Mädels uf Heimurlaub oder mit da Familie weg sind... han i mi entschiede endlich mol s was für min PKW (persönlicher kultureller Wert) z tua, ça veut dire: Kuturtage!! Das heisst i han mer vorgnoh s paar vo dena "das muasch unbedingt gseh ha" Kulturgüater z gseh.. und s biz Tourist z spiela.

Mittwoch:
Noch amana gmüatlicha Morga han i mi am Nomittag nach Paris begeh zum dr Friedhof Père Lachaise azluege. Neb viilna viilna riisiga Steihüüfa han i denn zwüschadura au mol n Nama gfunda wo mer bekannt vorkoh isch: Edith Piaf, Oscar Wilde, Jim Morrison... würklich Idrücklich sind aber nid dia Gräber vo da Berüahmtheite gsi, sondern eifach d Grössi vo dem Friedhof und dia unzähliga riisiga Grabstätte (ma zahlt 8000 Euro für so es Dauergrab).
Was es sust no z gseh gäh het? Zwei hüülendi Morrison-Fans, Verehrerinna vom Oscar Wilde (sis Grab isch voll vo Lippastift, wells schiinbar lässig isch dä Stei abzküssa...) und riisigi Japaner-Tourista-Gruppana mit Schirmhalter zvorderst... Eigetnlich ischs doch nur n Friedhof... aber jo... han mi denn, trotz mina afänglicha Skrupel vowega "Ort des Trauerns", zu s paar Fötali hiirissa loh...
Fazit: Keis Muss, usser für Fans vo Friedhöf, Morrison und co.

Donnstig:
Dr 1. Mai isch neb em 25. Dezember wohl dr einzig würklichi Fiirtig wo in Paris zellt. Denn sogar d Champs-Elysée het zue .. das heisst, dass au jeglichi Kulturelli Aktivitäte für n Tag hend müassa ussetza. S isch aber au so n schöna Tag gsi mit Kaffee, Joëlle und s bizeli Sunna!

Fritig:
Hüt han i endlich wieder mol öppis für d Schuel tue und miar am Obig s Grossprojekt vorgnoh:
Dr Louvre!
Punkt 6i am Obig bini am Igang gstanda (ab denn isch gratis für -26 jöhrigi). I han mi denn ganzi 140 Minuta amana Kulturrusch higeh... das heisst i han natürlich nur n ganz ganz kliina Teil vo dem riisiga Museum z gseh becho.
Jo, i han d "Mona Lisa" gseh. Mis Fazit? Das "achso-wunderbara" Kunstwerk isch soooo Klii. und ma kanns nid mol in Ruah aluege, well sich d Tourista drvor nur so uf d Füass stönd, und schupfend, damit jeda sis Bildli macha kann...- und vor allem: wer het eigetnli beschlossa, dass das so s ussergwöhnlichs Kunstwerk isch??
Und in dem Teil vom Louvre hets riisigi Rüüüm, gfüllt mit riisiga Werk, wo irgendwelchi göttlichi, kriegerischi oder erotischi Szene dargstellt sind, meistens mit viel z viel bleiche, nackta Menscha, wo alli totaaaaal symbolischi Gestene machend. (jo, vilicht denkend iar jetzt i bin en Kunstbanause... na und?) I bin aber trotzdem fasziniert durch dia Rüüm gloffa, well i nämlich hin und weg bin gsi vom Gebäude an sich!
In da Usstelliga vo dr Römischa, Griechischa und Ägyptischa Kunst han i denn scho eher Sacha gfunda wo mer imponiert hend- vorallem dia letschtara hends mer atue und so han i döt au sehr viel Ziit verbrocht mit Sphinx und co. Noch da scho oba genannte 140 Minuta han i denn aber n Kaffee nötig gha und bin denn au uf da Heiweg. Und i han denn au könna ruhig schlofa, mit em Wüssa, dass min PKW sooo viel grösser worda isch!
Fazit: dr Louvre sött ma scho mindestens eimol vo inna gseh ha. Aber nid unbedingt weg dr Mona Lisa (obwohl wenn ma scho döt isch sött ma si scho go luaga), sondern eifach weg em Museum an sich, wo nid nur vor Architektur und sinara Gschicht her s was z büüta het, sondern au jeda sicher s was für sin Gschmack findet...

.... fortsetzung der PKW-Tage (inkl. Fotos) folgt!!!

"ich will nicht mehr nach Hause..."

Liebi Lüüt,
Scho widr s paar Tägli her, sit mim verschneite Bloggitrag vom letschta mol... Also Froga wo schiinbar d Welt bewegend... (es folgt eine kurze beantwortung der meistgestellten Fragen:)

*Wetter???? Also dr Winter het sich noch dem unübersehbare letschta Gruass wohl jetzt doch endgültig verabschiedet und d Temperature bewegend sich langsam aber sicher im agnehma Rahme. Was mi natürlich sehr erfreut. Also Bitte Petrus, bitte lohns no s biz wärmer werda und jo kein Schnee me!!!!!
*Wochenendstorys? Ja, also vom 12. bis zum 16. April isch mis Schwöschterli do gsi!!! Mit em Heidi... Jo dia zwei hemmer denn au s paar lässigi Tägli beschert, wo mer nüüt usgloh hend. I lohn jetz eifach mol s paar Stichwörter im Ruum stoh... alles rundum überlohn i eurer Phantasie:
- Touri-Tour "Von der Défense zum Eiffelturm im Schnelltempo"
- Apéritif um 16 Uhr Nachmittags
- "Wo sind wir eigentlich??" - "Immer den grossen Strassen nach..finden wir schon irgendwie"
- Karaokebar mit sehr ansehlichem Servicepersonal, Gäll Corina!
- "Zuerst ausblasen, dann trinken" oder Brandblattere tüand weh...
- Ein Tisch- 5 Sprachen
- Heidi braucht das ganze Bett, Corina die ganze Decke und ich?!?!
- Secondhandshops, zerrissene Hosen und ein weiblicher Sänger = rockiger Tag ...
Jo s het Spass gmacht! Drei Mädels in Paris isch immer guat!

*Heiweh?? Nei, defintiv nid! Iar fehlend miar zwor scho... aber i fühl mi mitlerwiila würkli pudelwohl. Und miar fallend au immer widr in klini Depri-Phasana..wen mer dra denkend, dass es doch "nur" no 10 Wucha sind.. aber drum gnüssemers au ganz ganz fescht :)

*Mis Französisch? Jo, was sölli drzua scho sega. Macht sicherlich Fortschritt, vor allem z reda isch scho einiges flüssiger und langsam...langsam kan i au ds "Caviezelsche"-Trauma abbaua... aber nur langsam...:) Also ma het mi au scho gfrogt öb i us em französischa Teil vor Schwiiz kuma. Portugiesisch verstohni mittlerwiila scho vil meh als am Afang und au mini dütschi Ussproch verbesseret sich - positivi Nebeeffekt!
Und apropos französisch schriba, möcht i eu zeige wia d franzosa SMS schribend (das SMS isch nid an mi grichtet gsi , sondern dr Absender het dia falsch Nummara gwählt..):
"Slt pd jpe pas c och en ce moment m bientot ok no soucaye la mifa le taff ca va porte toi b1 ok mn pote" - Und i han an minara Franzprüafig abzug überkoh, wenn i es "e" vergessa han... *Kopfschüttel*

*Schaffa? Alles klar momentan. D Ferie hend jetz agfanga, was heisst i schaffa halbtags. Mim Kliina han i s mitlerwiila würkli guat. Letscht nacht het er mi au dreimol!!! gweckt, well er nid het könna schlofa... ja, das er mi mag het also au sini negativa Sita, wia s usgseht! Dr gross isch kein eifache, aber ma het jo do so sini kliina tricklis langsam dussa zum si bändiga:) und was jo z schöna isch: in üsara Au-Pair-Truppa teilemer dia gliicha Sörgali und so lömmer gera mol üses "Mann, nervt das Kind heute!" an üs gegesitig us...

*Sind d Franzosa würkli so, wia das z Klischee seit? Jein! Aber a ganz gnaui Analyse möcht i denn erst am Schluss veröffentlicha. Aber bis dörthi könnd iar miar jo gera in eure Kommentär, wo jo hoffentli widr mol zahlriich folge werdend (!!!) s paar Klischees ufschriba wo iar kennend..damit i dia sammla kann und analysiere:)

Alors, je vais me coucher maintenant ... bonne nuit à tous! und i lohn widr vo miar ghöra.. ah jo, wer n Kurztripp noch Paris macha will- d Züg sind so günstig wia nie momentan!!:) Bisous, euri Annatina, eures Tiinchen

C'est moi, le roi!

Bonjour, Kikou, Salut, ça va...

inspiriert vo dr schriiblust vom Andrea (sorry, din link wird no gmacht!) han i mi au widr mol zu amana Blogg hiirissa loh. Und usserdem wend jo mini zahlriicha Leser au uf ihri Kösta koh. Also, mittlerwiila bini in dr Mitti vo mim Au-pair-Ufenthalt akoh (gester um genau z sii). s isch unglaublich wia dia Täg so dahiiflüügend ...

Also mini Prüafig isch übrigens guat usganga - han 15 vo 20 Pünkt ergatteret und bin drmit sogar no guat über em Durchschnitt vor Klass glega. Letscht Wucha het also z neue Trimester agfanga und d Klass isch vo 15 (Max.) uf mikrigi 6 Persona gschrumpft . Het sini positiva Sita, well ma so endlich au mol z Wort kunnt, aber au sini negativa (wenn ma müad isch mag ma nid immer vor Olga ufgforderet werda n Text vor z lesa ...:)) Jetzt simmer no 2 Schwedinna, 1 Mexikanerin, 1 Polin, 1 Russin und mini wenigkeit. Apropos Nationalität. ischs nid unglaublich- bi üs isst ma schiinbar nur Schoggi und Fondue, isch riich und wohnt uf amana Buurahof- han i miar sega loh!

Was momentan nervt? d Buslinie Chambourcy-St.Germain-en-Laye isch totaaaaal blockiert. Staus ohne Ende. han hüt unglaublichi 50 Minuta im Bus verbrocht (zuasätzlicha Nerv-Faktor: dBusfahrer do meinend es sig lässig, wenn si irgend en Radio-Sound durch da ganz Bus dröhna lönd... )- normalerwiis hemmer 20 Minuta nach St.Germain. Aber ma baut halt jetzt scho sit 2 Monet an dr Verbindigsstross und i han mer hüt sega loh, dass das no bis im Summer ahalta wird... naja.

Was momentan erfreut? Mir Marja han i s super und au d Kind hend immer meh "I mag di"-Phasana als sörtigi vor Sorte "du bisch blöd und nervig". jo vilicht zahlend sich dia vila Stunda knetta, Umahüpfa, "Charlotte aux Fraises" luaga und "cache-cache"-spiele jo us??!! Aber i weiss jetzt au wieso dr klii mi gera mol s biz uma befiehlt- er het mer halt erklärt "C'est moi, le roi!" (Ich bin der König, für d "i han halt Italienisch gha in dr Schual-" Lüüt unter eu).

Paris gnüss i natürli immer no so oft wia möglich. s git eifach zu vil plätzli, Usstelliga und sustigi Sacha wo ma nonit gseh het. Grad hüt bini an en wunderbara See heragloffa (Station Porte Dorée). letscht Samstig bini go d Consiergerie aluaga- döt wo d Marie Antoinette und anderi böösi buaba und Mädels uf da Tod durch d Guillotine gwartet hend. s biz n gruusliga ort, aber interessant:) D Isa und i hend denn festgstellt, dass mer doch froh sind, hüt zu tags z leba und nid damols, wer will scho vor em versammlete Paris enthauptet werda... und usserdem (Zitat Isa): "Wenn man so die Bilder betrachtet, waren die Menschen früher so einiges hässlicher..." :) Vilicht sind jo aber au d Moler eifach total unbegabt gsi!? wer weiss... uf jeeeeda fall ischs cool gsi.

Und dann noch zum Wetter: Hüt morga bini ufgwacht und was liggt dussa? Schnee! das isch für Paris seeehr seehr untypisch! Am Fritig no bini fascht mim T-Shirt go spaziere und jetzt das... d Temperatura sind am Sunntig schlagartig gsunka und denn hets agfanga schneia! Obwohl dia zwei kliina hüt morga a uuu freud gha hend, han i mi scho grad s biz gnervt, well i doch eifach nur no gera mol Früahlig het.. aber joooo... de la patience! bi eu ischs jo schiinbar au nid besser..?!

Hüt han i eigetnli wella dr Fakel-Lauf do vom olympischa spiel go luaga (oder besser d Demos drgege...miar hends denn aber liaber loh, nid das mer no an en Polizist grootend und er üs mitnimmt well mer ihn nid verstönd oder so...:), ma weiss jo nie)

- i bin übrigens grad am "Fascination" vo "Alphabeat" am losa! suuuper Musig, sehr z empfehla:)

Also, denn mol wieder "Au Revoir" bis zum nögsta mol....je vous embrasse de loin!!

DANKA EU ALLNA für euri Kommentär, freu mi amigs riisig z gseh wär sich do für mini langwiliga brichtli interessiert:)

usserdem: NEUI FÖTALI IM ALBUM!!!

bisous, euri Annatina

Deux lapins de Pâques et un canapé rose

Salut à tous!! nur no 14 Wucha..unglaublich.. aber i gnüssa jeeeeda Moment:)

En retard: Joyeuses Pâques à tous!!! I han jo ghöra sega, dass eu dr Osterhaas statt Eier dr Winter zrugg brocht het?! (jeda wo do jetzt en schadafroha Unterton wohrgnoh het... het Recht gha. haaaaahaaaaaaa)
Nei, i han au nüt z lacha- z Wetter isch so gar nid früahligshaft:( Dia letschta paar Täg hets Wetter scho fascht verruckt gspielt. Ständig begleitet vo amana starka Wind hets ghaglet, gschneit, gregnet und plötzlich het d Sunna wieder gschunna- so a Abfolg het sich all paar Stund vo neuem abgspielt. Ds Thermometer het au kei grossi Sprüng gmacht... So isch min lang ersehnte Früahligsafang vom Winde verweht worda... so z sega.

Neuigkeite an dr Velo-Front: Am Samstig, am 15ta, han i denn endlich s neus Velo im Gwüahl vom Occasions-Usverkauf gfunda. s isch s relativ alts, ohni grossa Luxus. Aber s isch in guatem Zuastand gsi und do i kei Lust han, nomol Opfer vo amana Diebstahl z werda isch es älters Modell doch wohl z besta gsi. I han jetzt au es uuuuuu krasses Schloss, wo jedem böösa Buab standhaltet (hoffi zumindest).

Doch iar frogend euch wohrschinhli scho, was min ominösa Titel wohl so für n Hintergrund het?! Jooo, das alles het am Fritig agfanga- als öppa am 6i am Obig a wunderbar farbigs VW-Büssli vor üsem Tor parkiert het. Jajaaaaa- i han Bsuach kriegt, vom Nicolas und em Jörg- mini zwei persönlicha Osterhaasa:) Am Fritig han i ihna mol - das sött jeda tourist mol gseh ha - s " O'Sullivans" in St.Germain zeigt. Am Samstig hemmer üs uf nach Paris gmacht.
Doch bi üsara Tour "Les Halles - Sébastopol-Bastille-Cité-Hôtel de Ville" het üs denn plötzlich dr Rega überrascht (naja, vorusgseh het ma s jo...) Uf jeda Fall hemmer üs denn in es grosses Kaufhus grettet, wo s üs unter anderem d Spielzüg-, d Elektro- und d Sofaabteilig atua hend. (dickere Fründschafta hemmer mit amana rosa Sofa, amana riisa suizidgfährdete Teddybär und em Marsupilami gschlossa - wia sich herusgstellt het, bin i wohl dr verscholla Zwilling vo dem kuscheliga Tierli. *Huba*)

Mit frischa Getränk und amana Buch voll mit Crèpes bewaffnet hemmer üs uf da Weg zum Sacré Coeur gmacht, wo üs es ufkommends Gwitter unter ds Vordach vor Kircha gschüücht het. Zwor hets döt kei Musiker meh gha, aber s isch glich gmüatlich gsi und mit s paar interessante Gspröchthemas goht d Ziit doch au schneller verbi.
so hemmer üs denn au bald uf zum "Truskel" gmacht. Döt hemmer denn a wunderbar lustigi Nacht verbrocht (Nicolas, ma langt nid jedes Auto ah). Uf jeda fall simmer denn am 7i am Morga au endlich müad in üsi Bett gsunka und hend bis am 2 gschlofa. Bald sinds denn au scho wieder abdüüst, dia zwei Jungs.
Iar gsehnd also, i han super Ostere gha. Fötali sind bald online.
Gester, Mäntig, han i denn also no s bizeli glernt- denn hüt hemmer üsi Trimesterprüafig gha. Dä Test entscheidet eigentli do drüber, öb ma sis Diplom für da Kurs überkunnt und ob ma im nögsta Trimester witerhin uf dem Niveau in da kurs goht. (das sind zwei Stund voller "Hä-Moment" gsi, aber nid nur für mi, also denki, dass i au witerhin bir Olga im B1 sitza bliba dörf)

Do d Marja und dr Rodrigo jezt wieder do sind isch alles wieder Alltag. Und au z Wetter het sich hüt wieder vo ara ruhigara Sita zeigt.. hoffemer uf a baldiga Früahligsafang...!!!

ah jo: i han mer sega loh i heg as suuuper französisch (guat, d franzosa sind mengmol scho schleimer, aber s het guat tua das z ghöra). Usserdem han i gmerkt, dass ma würkli erst richtig fluacha lernt wenn ma mit Franzosa redet - Jo liabi Franzlehrer, s "Mince Alors" vom Découvert kann do nid mithalta.
I wünscha eu a wunderbari winterziit und bis bald amoll.... wenns wieder heisst:
Salut à tous!
bisous, euri Annatina (Franzosa findend dä Nama mega schön übrigens.. bin do voll dr King:))

des nouvelles....

Salut mes ami(e)s..

Sind au scho wieder es paar Tägli verganga... Was gits also neus us em Franzosland?
Miar hend jo bis letschta Sunntig zwei Wucha Feria gha. Das heisst genauer gseit für mi: kei Schual, drfür d Kind dr ganz Tag im Huus. Und d Fernseh-Generation (Viil schlimmer als miar damals, liaba Papa) muass ma jo scho fascht mit Gwalt zum Huus usa zerra, damit dia sich mol an dia früsch Luft begebend.
So hend sich d Marja und i also s biz abgwechslet mit dahai sii und d Feria sind ganz fridlich verloffa. Noch dem mini Eltere weg gsi sind sind leider au sehrvil vo da Au-Pairs do weg gsi (Heimat-Urlaub oder in da Feria mir Gastfamilie..).
Am Sunntig, mitte Feria, simmer im Disneyland gsi (gucke Fotos..). Ach was für en Kitschhuufa! Viil Rosa, vil Kind, vil Süassigkeite, vil blödi T-Shirts, vil Fotoapparat und vil langi Schlangana vor da Bahna. Aber jo, zwei drei witzigi und recht halsbrecherischi Bahna hets denn doch gha, wo dr Rodrigo und i üsa Spass gha hend! Wia zwei kliini Kind simmer amigs glücklich zur Bahn usakoh...während dr André drneba fast zitteret het.

Und jetzt haltend eu fescht: Letscht Samstig bini in dr Rue Daguerre gsi!!!!!! Wer kennt si no? dia wunderbari Stross us em Decouverte 1? I muass sega, s isch es fridlichs Viertel döt und d Rue selber isch recht lang und het vil klini Lädeli. D Isa und i sind also grinsend und mim Fotiappart bewaffnet durch dia Stross gloffa, während üs alli dumm agluagt hend, well doch sust döt kei Tourista unterwegs sind. (Wir sind auch keine Touristen, Gäll Isa) d Fötali folgend bald... leider hemmer dr Arthur nid gseh...

Am Sunntig simmer denn ganz Kulturell gsi und hend üs vom gruusiga Wetter in es Museum triiba loh. Ds Musée Carnavalet isch recht gross und ischs historischa Museum vo Paris. (Wia Paris früahner usgseh het, d Gschicht, wichtigi Persona..) Meh oder weniger ischs denn au recht interessant gsi. Aber noch so 2-3 Stund simmer denn würkli uf en Café agwiisa gsi.

Und sit em Mäntig het also dr Alltag wieder agfanga. Doch alles isch nid ganz wia immer. dr Rodrigo und d Marja sind sit am Zischtig in Brasilie, anstell vo ihna isch d Tanta do. Mit ihra muass i Englisch reda- und was isch z erstunlicha dra? s kömmend immer wieder französischi Wörter dri:) Do si sust allai wär, schaff i also au das Weekend. Aber jo, git schlimmers.
Bi miar in dr Schual lauft eigetnli alles prima- d Olga, üsi Prof, het so ihri täg wo si üs zimlich nervt mit Grammatik, doch denn ab und zue isch si au ganz a liabi. Besser als üses Supermodel us dr Kantiziit isch si allemol.

Z Wetter isch momentan schrecklich. s Regnet vil oder isch eifach grau und gruusig windig. Nüt vo schönem Sonnenschein und Früahligsgfühl..aber jo, die Hoffnung stirbt zuletzt.

Am Samstig kann i endlich wieder es neus Velo go kaufa. denn hends nämlich Occasions-Markt, denn findi vilicht eis wo älter usgseht und nid so schnell klaut wird.. hoffemers zumindest.

A info, damit i nüm gfrogt wirda: i kuma so um da 1. Juli hei. I wirda zwüschadrinna nid heireise, well i mini Feria wo i z guat han für mini Bsuach ufbrucha möcht ( han jo au nur 1 Wucha z guat, pro 6 Mönet) Aber das isch scho ok so.. es gfallt mer do jo au mega. I gnüssa vor allem d Weekends in Paris mit da Mädels. Unter dr Wucha isch eh vil los, so wirds eim au nie langwilig und sust ka ma am Obig ins O'Sullivans- es Irish Pub in St.Germain- go s biz Karta spiela. Das isch au sehr fridlich:)

I freu mi über jeda Kommentar, au in französisch (Merci Mademoiselle Diethelm, pour votre message. Bon, peut-être ce n'est pas exempt d'erreur ou parfait. mais on le comprend, ça c'est la chose la plus importante non?! même Olga fait des fautes:))

mes meilleurs salutations, je vous embrasse de loin..
annatina

Für mini treue Leser...

Salut à tous!

Wia i gwüssa Leser versprocha han, gits widr mol n Blogg. Was gits also neus z verzella?
Z erst mol zu da negativa Nochrichta:

Obwohl i mi bim Tasche-Dieb-Versuach als Superwoman ufgspielt han und schlimmers han könna verhindara... bini denn doch no bestohla worda.
Und zwor hani letsta Samstig leider müassa feststella, dass mis Velo, wo i jo do kauft han, weg isch. I hans z St.Germain-en-Laye am Bahnhof loh- zwüscha hunderte vo Velos. Und jetzt ischs also weg..das würd i mol Pech nenna. Uf jeda fall bini jetzt Velo-los, was heisst, dass i nögst Wucha wieder mol in da Lada marschiere dörf und mer es neus poste muass... denn ohni Velo bini do in Chambourcy eifach abgschnitta.

Und jetzt zum Positiva:
Vom Samstig bis am Mittwoch obig sind mini Eltere do gsi. I han vo dr Familie frei überkoh und bin so s bizeli mit maman et papa dür Paris zottlet. I han sogar s bizeli Kultur gnossa (2 Museum in 4 Täg) und han sehr vil guat gessa! Han au zweimol chöna im Hotel bi mina Eltere schlofa, damit i nid hei muass..scho einiges praktischer. Ihres Hotel isch grad neb dr Sorbonne-Uni gsi -do sött ma studiere!
I hans also sehr gnossa, mini Eltere widr s biz um mi z ha und dia täg sind au vil z schnell verbi ganga..leider!

Jetzt schaff i wieder- d Kind hend jo Schualferie, no bis am 9. März. Aber do i selber au kei Schual han isch dr Alltag scho s biz relaxter.

Was gits sust no neus? Z Nachtleba bini no am usteschta- s git eifach so vil wo ma kann goh..aber i denka, dass i scho zwei würkli guati Bars/Clubs gfunda han, wo ma au mol s Konzert gseh kann.

Also, wer Paris no nie gseh het - kömmend mi cho bsuacha. s isch s würkli wert! Obwohls zwor grad momentan widr mol regnet- wird dr Früahlig sicher uuuuu schön!

Wirda bald no s paar Fötali meh ufschalta!
à plus tard... votre Tiinchen/Trine/Annatina

Grossstadttauglich...

Salut!

Das Wuchanend han i öppis erlebt, dass isch grad en eigene Blogg-Itrag wert! Also... es git en Moment im Leba vo ara junga Frau, do wird sie sanft oder eher weniger sanft us ihrer "Alli- Menscha-sind-Lieb"-Welt usagrissa und si wird in die hart Realität vor Grossstadt inagholt..öb si das will oder nid.
Dä Moment isch bi miar also am Sunntig, ca. 17.10 do gsi.. Also...vo afang ah...

Ca. 16.00 Uhr - Champs Elysée: Isa und i entscheidend üs, weg dr schwindende Sunna, es Pärkli z suacha, wo mer nonie gseh hend. Also simmer mit dr Metro 7 , später 7bis, richtig Station Botzaris düüst.
Ca. 16.30 Uhr- Park : I merka, dass i dringend ufs WC muass, drum suachemer s Restaurant.
Ca 16.45 Uhr- Schnell Imbiss: Miar entschlüssend üs no grad a Portion Pommes z kaufe
Ca 16.55 Uhr- Schnell-Imbiss: Mit da Pommes setzend miar üs uf Stüahl vor em Imbiss
Ca 17.09 Uhr- ....: Alles isch no ruhig, d Isa entdeckt d Mayonnaise und freut sich!
und denn...

Ca 17.10 Uhr: A Hand packt vo hina mini, neb mina Bei stationierti, roti Täscha (Inhalt: MP3, Buach, Portemonnaie, Karta und Uswiis, Schlüssel, Handy, etc etc)... i realisiere,(ima bruchtail vora sekunda) was passiert... schiebe mit Wucht min Stuahl noch hina und renn dem Typ hinadri...
noch wenige Meter verschwindet er hinter em Ecka vom Schnell-Imbiss und i hinadri... er isch ca. 10 bis 15 meter vor miar, als er mit amana Blick zrugg realisiert, dass i ihm nospringa. Us angst, dass i ihn denn doch no verwütscha, wirft er d Täscha in hohem Boga weg und springt sina zwei Kompliza, wo scho wiit weg sind noh...
Das ganza isch kei halbi minuta ganga...

As wohrlichs Schockerlebniss!!! I sammle also zitternd mini Sacha zäma, wo uf em Boda verstreut liggend, während hinter miar d Isa und no anderi uf mi zuakömend und mi frogend, öb i no alles han...
Zitat Isa:"Wie schnell warst du denn bitte? Ich hab das jetzt ja gaaaaaar nicht gecheckt..."

Zum Glück han i also mini Täscha wohl behalte zrugg gha!
Was i z truuriga dra gfunda han, dass dä Dieb villicht grad amol 14/ 15 Johr alt gsi isch...

Und was lernend mer drus?? Täscha uf d Bei, festheba und kritisch jeda beäuge wo verbilauft!:)
Uf jeda fall bini jetzt testet uf mini Grossstadttauglichkeit und mini Reaktionsfähigkeit het standghalta.

Z nögst mol hoffentlich mit s biz fründlichere Gschichta...
Bisous, eures Tiinchen

Déjà un mois...

Bonjour mes ami(e)s...

Jetzt bini uf da Tag scho n ganze Monat do in Chambourcy! I han mi mitlerwiila ganz guat iglebt..kenna scho s paar anderi fille au-pair, mit dena i scho regelmässig mol ins Pub uf St.Germain gang s biz go Karta spiele, oder mol sust s was go tua...
und kuma mit dr Arbeit au guat z recht. S ghört alles langsam zum Alltag.

Und ma glaubts fast nid, gell Flu, dass i au mitlerwiila ganz guat z recht kuma mit der Wäschmaschina, em Bügelbrett und em Kochtopf. Obwohl i am afang no s paar verfärbti Socka, s paar zerknittereti T-Shirts und abrennti Plätzli han müassa in Kauf neh... aber das ghört halt zum Lernprozess. So bini scho fascht zur Huusfrau mutiert, wo ihra Wäsch- und Bügeltag het... Ka ma sich kum vorstella,hm?

Ds Dörfli und au d Stadt St.Germain-en-Laye kenn i mitlerwiila au s biz- han mi au gnuag mit em Bus, em Velo verfahra und au verlaufa- so lernt ma a Ortschaft jo bekanntlich am besta kenna...

Mit da Kinder laufts au ganz guat. Sie hend so ihri Täg wo si mi ganz guat mögend- an andere drfür denn gar nid. Sowit i das aber vo andere Au-Pairs ghört han isch das normal, drum mach i miar do kei Sorga.

An da Wuchanend bini amigs in Paris. Alles isch zwor sehr tüür döt, aber au dreifach so schön:) Drum ka ma gar nid gnuag kriege, vom Montmartre, vo da Pärkli, dr Champs-Elysée, und all dena kliina Läda, Strössli und natürli vom Nachtleba vo Paris. So schloft ma also am Wuchanend gera mol weniger, well ma s natürlich nutza will:)

Aber au Frankriich het sini negativa Sita:
-Öffnigsziita vo Läda, Schwimmbäder, Gschäft etc. sind mengmol- wia s schiint fascht willkürlich und unverständlich...
-d Schuala sind sehr strikt und unglaublich diszipliniert- fascht scho s biz überoganisiert.
-klini Ortschafta sind laaaang nid so guat erschlossa wia bi üs- das heisst ab em 9i am obig han i kein Bus meh! und am Sunntig sowieso fascht keine..(zum glück gits Velos...)

So het wohl jedes Land sini schöna und negativa Sita:)

Zum Wetter: Sit eire Wucha schint do ununterbrocha d Sunna- s isch zwor am Morga und Obig no recht kalt..aber am Tag wunderschön sunnig und warm! Do sitzt ma doch gera mol z St.Germain-en-Laye in Park und list es schöns französischs Buach, knabberet anere Baguette und lost "Renan Luce" (en französischa Sänger- han i do entdeckt... bi dem sina Lieder wird eim grad französisch z muat:D)

Mis französisch isch zwor nonit fliessend und perfekt...aber i gib mer Müah und ma lernt täglich... das isch do scho supr.

Also, iar gsehnd..noch eim Monet bini do scho zimlich wohlig... Au wenn i eu natürli ständig s bizeli vermissa bini miar sicher, das dä Ufenthalt a super Sach isch und i gnüssa jeda Tag!

I melda mi bald widr mol.. des bisous, Tiinchen

ça va bien!...

Salut à tous!

Scho 17 Täg! Unglaublich wia schnell d Ziit vergoht..bin doch erst grad akoh!
Also zum mol dia allgemeine Froga z beantworta: d Familie Lacerda isch sehr nett. I fühl mi do zimlich wohl und mit da Ufgaba im Huus kum i au guat z schlag. Klar sind Buaba im Alter vo 3 und 7 johr nid grad d Engeli in Person, aber das passt scho.
In dr Schual hemmer s au guat- miar sind a klass vo sagehafte 15 Persona (das isch z Maximum) us allna Länder (Schweda, Spanie, Dütschland, Östrich, Russland, Tschechie,...). Klar, es isch schual- das heisst au Ufgaba, was natürlich nid so wahnsinnig faszinierend isch- aber das ghört halt nunmol drzua, wenn ma a sproch lerna will.
Sust gfallt mer Frankriich ziemlich guat... witzig isch eifach- wia anders es do mengisch isch- obwohl ma doch gar nid so wiit vo dahai isch.
Zum Bispiel wär do dr Verkehr! 1. Frog i mi, wieso s do überhaupt Fuassgängerstreife het, denn s lauft eh jeda drüber wo er will, wenn er will... und d Autos haltend jo eh au nid.
2. hets do glaub kei gnaui regelig weg em Velofahre. Mengmol, wenn ma glück het, hends en Velostreife azeichnet. Dä hört denn aber mengmol au eifach widr uf und ma muass sich als Velofahrer selber entscheide, ob ma uf em Trottoir (fluechendi Fuassgänger) oder uf dr Stross (hupendi Autofahrer) fahre will.
3. Parkplätz sind au eher unnötig. Jeda parkiert do wo und wenn er will. Wenn ma kei bock het uf a langi Suachi noch amana freie Parkplatz- denn fahrt ma uf s Trottoir, stellt dr Warnblinker i und goht sini Ikäuf go macha. Und wenn mol a Parklücka nid gnuag gross isch zum sitwärts inaparkiere, denn rammt ma dr hinter und dr vorder eifach s biz..den passt ma eswenn jo sicher ina:) ...jo, das isch d Philosophie vo da franzosa: Was nicht passt, wird passend gemacht- oder: Man muss nicht alles so eng sehen!:)
Interessant sind do au d Schuala. Denn do lauft keis kind allai hei- nei! Ma wird abholt... am beschta grad no mit amana z Vieri. Denn ka ma das Schokolade-haltige Zvieri grad uf em Heiweg mim mami/au-Pair/Kindermeitli verspiisa. D Schuala werdend denn au immer grad zuagsperrt, sobald alli schüaler dinna sind.... (das au jo keis entwischt;))
Dia letschta zwei Wucha han i also do drmit verbrocht mi do izleba und d gegend s biz z erkunda. Am wuchanend bini jetzt beidi mol s biz paris go unsicher macha _ Ach i liaba dia Stadt! S git doch eifach kum s was schöners, als am Obig bim Sacre Coeur z sitza , vilicht spielt no s wer musig und du kasch über ganz Paris luaga!
Es goht mer wia gseit, zimli guat..klar, vermiss i mengmol no s biz ds dahai, eu und aifach s biz ds gwohnta... aber i denka, das isch normal! Mis Französisch het sich zwor nonit merklich verbesseret, aber i arbeite dra:) Sust, würd i mi eifach über euri Mails, SMS oder Skype-Telefonat freue und

JE VOUS EMBRASSE annatina, tiinchen, trine....

Salut mes amis!

Noch vilna Versüach, han i s jetzt endlich gschafft zmindest a halbwegs funktionierendi INternetverbindig herazbringa!:)
Jetzt bin i sit öppa 25 Stund in Chambourcy. Also- zum ersta zwüschabricht: D Familie Lacerda het mi gester am Bahnhof empfanga. Denn simmer mim auto noch Chambourcy gfahra- durch Paris dura hemmer weg vilna Staus unglaublichi 60 Minuta brucht!

D Familie (parents: Rodrigo et Marja, et les garçons André et Victor) passt mer sehr guat. Dia zwei kliina sind zwei wirbelwind, dr vater sehr herzlich und ruhig und d Muetter kümmeret sich rüahrend um mi. Zwor verstohn i d hälfti nid wo si segend, well si mengmol unter sich no portugisisch redend (si sind jo brasilianer) - au si müand sich dra gwöhna französisch z reda.
Hüt morga bini recht früah ufgstanda und d Marja het mer denn z Dörfli zeigt. Es isch wia us em Bilderbuach, i segs eu. Mega härzig und vili alti Gebäude. S het alles wo ma brucht zimli in dr Nöchi und a nöchi Busstation. Doch obwohl s u a härzigs Fleckli isch, isch nid alles idyllisch..d Marja het mer verzellt ,dass dr Polizeichef vor eim johr in sinem huus ermordet worda isch und ma bis hüt nid weiss, wer dr täter gsi isch!:)

Am Mittag simmer denn uf St.Germain-en-Laye. Ebefalls a härzigi Stadt, mit vilna kliina Gässli und amana imposante SChloss (dr Louis 14 isch do gebora, oho!) und amana riisiga Park- i freu mi scho uf d Spaziergäng. Apropos Spaziergäng do hets sehr vil Wald.. ( d Autobahn het sogar extra es Tunnel unter em Wald dura). Vom park us het ma a wunderschöni Sicht, wo ma au Teil vo Paris gseht. Miar hend denn no imana typischa französischa Restaurant gessa- s isch köstlich gsi und i bin jetzt no satt:)

Jo, wia iar gsehnd ischs genau dia richtig gegend für mi. und au wenn dia zwei kliina momentan no s biz blöd tüand (zum usprobiere wia wiit si bi miar goh könd), so werdend si sich au an mi gwhöna, so denki.
Mora gohn i denn z erst mol in d Schual. Denn lerni s paar anderi Au-Pair kenna, do freu i mi scho druf!

Mim Französisch han i zwor no so mini liabi müah, aber das kunnt scho. Aber bim Radio und im Fernseh versohn i no kum s was:) Aber eba, i bin zuaversichtlich, dass i das no guat herabringa (das Cartoon luaga und Büachli vorlesa isch echt hilfrich:))
I wirda bald amol s paar fötali macha, vom Huus, dr Familie und dr Gegend, damit iar au s biz luaga könd, wo i mi do ufhalta.

I finds schön, läsender min Blogg und i wünsch eu witerhin a guati Ziit. I bin immer no uf em Handy erreichbar, per Skype au (annatina88) und natürlich per e-mail.

Bisous!!!!
Annatina